កំពង់ស្ពឺ៖ ស្នងការដ្ឋាននគរបាលកំពង់ស្ពឺបានឱ្យដឹងថា ប្រសិនភ្លៀងនៅបន្តធ្លាក់ នោះផ្លូវជាតិលេខ៤ នៅចំណុចភូមិទី៦ ឃុំយាយម៉ៅពេជ្រនិល ស្រុកភ្នំស្រួច ស្ពានអូរគគីរ នឹងមានជំនន់ទឹកភ្លៀងកើតឡើង។

នារសៀលថ្ងៃទី២៩ ខែកក្កដា ឆ្នាំ២០២៣នេះ សមត្ថកិច្ចក៏បានអំពាវនាវដល់ប្រជាពលរដ្ឋ មេត្តាបន្ថយល្បឿននៅចំណុចទឹកកំពុងហូរឆ្លងកាត់កំណាត់ផ្លូវជាតិលេខ៤ ស្ពានអូរគគី ភូមិទី៦ ឃុំយាយម៉ៅពេជ្រនិល ស្រុកភ្នំស្រួច ខេត្ដកំពង់ស្ពឺ ដោយបញ្ជាក់ថាបើសិនភ្លៀងបន្ដធ្លាក់ ផ្លូវជាតិលេខ៤ និងមានជំនន់ទឹកលិច នៅចំណុចភូមិទី៦ ឃុំយាយម៉ៅពេជ្រនិល ស្រុកភ្នំស្រួច ស្ពានអូរគគី ចន្លោះគីឡូម៉ែត្រលេខ១០៦-១០៧ នេះទៀត។

កងកម្លាំងនគរបាលបានកំលាំងនគរបាលខេត្តកំពង់ស្ពឺ នៅតែឈរបញ្ជាចរាចរណ៍ក្រោមដំណក់ទឹកភ្លៀង និងខ្យល់ ត្រៀមប្រចាំការសម្រួលចរាចរណ៍និងជួយអន្ដរាគមន៍ករណីមានឧប្បទ្ទហេតុផ្សេងៗកើតឡើងកំឡុងពេលនេះ។

គួរឱ្យដឹងដែរថា តាមការព្យាករណ៍ ឧតុនិយមនៃក្រសួងធនធានទឹក ប្រកាសថាកម្ពុជារងឥទ្ធិពលប្រព័ន្ធសំពាធទាប គឺព្យុះទីហ្វុង ឈ្មោះ Doksuri ដុកស៊ូរី កំពុងធ្វើដំណើរឆ្ពោះទៅប្រទេសចិន បង្កអោយមានភ្លៀងធ្លាក់ពីថៃ្ងទី២៨ ខែកក្កដា រហូតដល់ថៃ្ង១ ខែសីហា ឆ្នាំ២០២៣៕